Тырым уоттаах Тылгыныбыт нэһилиэгэр, Алтынньы ый 7 күнүгэр, "Түһүлгэ" сынньалаҥ киинигэр, учууталлар күннэрин көрсө "Учуутал - сүбэһит уонна доҕор" диэн сүрдээх үчүгэй тэрээһин үрдүк таһымнаахтык буолан ааста. Арассыыйаҕа учуутал, уһуйааччы уонна сүбэһит сыла биллэриллэн, сыл устата араас тэрээһиннэр тиһигин быспакка ыытылла тураллар. Учуутал - хас биирдии киһи олоҕор, дьылҕатыгар олус улахан оруолу ылар. Учуутал киһи дууһатыгар, өйүгэр - санаатыгар, үлэтигэр - хамнаһыгар, олоҕор -дьаһаҕар олоҕун усталаах туоратын тухары сирдьит буолан хаалар. Биһиги Ийэ дойдубут сарсыҥҥыта бүгүн кэнчээри ыччаттарбыт хайдах дьон буола иитиллэн тахсалларыттан, учууталтан олус тутулуктаах. Онон, эппиэтинэс хас биирдии учууталга, син биир итэҕэл курдук, улахан. Куонкурус буолуон иннинэ, Тылгыны нэһилиэгин муниципальнай тэриллиитин баһылыга Иванов Е.А. ,бастыҥ учууталларга наҕараадалары,махтал суруктары үрдүк сыанаҕа туттарда. Бэйэтин эҕэрдэ тылын учууталларга анаан, бырааһынньыгынан эҕэрдэлээтэ.

"Учуутал-сүбэһит уонна доҕор" диэн күрэхпит 5 түһүмэхтээх ыытылынна. Күрэххэ кылаас салайааччылара, үөрэнээччилэрин кытары кытыннылар. Ол курдук, 5-кылаас аатыттан, учуутал Осипова А.В уонна үөрэнээччи Иванова Оля, 6-кылаас аатыттан, учуутал Долгунова Е.Г уонна үөрэнээччи Алексеева Алина, 7-кылаастан бастакы учууталлара, Дмитриева С.К. уонна үөрэнээччи Попов Ильдар, 9-кылаастан учуутал Никифорова Е.Е. уонна үөрэнээччи Кононова Мия ситиһиилээхтик кыттан,дьоро киэһэни көрөөччүлэргэ,дьүүллүүр сүбэҕэ бэлэхтээтилэр. Кыттааччылар бары бэлэмнэнэн кэлбиттэрэ, көрөөччү хараҕар тута быраҕыллар.

Түһүмэхтэри кылгастык билиһиннэрдэххэ маннык:

I - кы түһүмэх аата: "Для вас учителя" диэн, бу айар түһүмэх. Манна үөрэнээччи учуутал күнүнэн эҕэрдэлээн истиэнэ хаһыатын оҥорбутун көрөөччүлэргэ кэпсээтэ. Хаһыаты кылаас үөрэнээччилэрэ бары сүбэлэһэн, бииргэ оҥорбуттар. Хаһыакка эҕэрдэлэр, хаартыскалар хото киирбиттэр.

II - түһүмэх: "Наша школьная жизнь" - диэн, манна учуутал видеопрезентациянан, кылааһын күннээҕи олоҕун, оскуолатааҕы умнуллубат күннэрин сиһилии кэпсээтилэр. Учууталлар бары наһаа үчүгэйдик, интэриэһинэй гына кэпсээн көрөөччүлэргэ оскуолатааҕы сылларын санаппыт буолуохтаахтар диэн ээр - сэмээр сэрэйэбит.

III - түһүмэх: "Вы повели нас по дороге знаний" бу түһүмэххэ үөрэнээччи сөбүлүүр учууталыгар анаан бэйэтэ айбыт хоһоонун,санаа ситимин, өйтөн суруйуутун ааҕан дьүүллүүр сүбэни уонна көрөөччүлэри сөхтөрдө. Оҕолор үксүлэрэ бастакы учууталларыгар анаан бэйэлэрин айымньыларын суруйбуттар. Сахалыы, нууччалыы уус-ураннык хоһуйан, тыллара-өстөрө баай саппаастааҕын көрдөрдүлэр.

IV - түһүмэх, "Мы веселые артисты" диэн, бу уус - уран нүөмэр. Учууталлар үөрэнээччилэрин кытта тэҥҥэ үҥкүүлээн тэйдилэр, ырыа ыллаан дьиэрэттилэр, кылаас олоҕуттан көрдөөх сыаҥкалары оонньоон көрдөрдүлэр. Ол курдук, Айталина Владмировна, Иванова Олялыын ыллаан дьиэрэттилэр, хомуска оонньоон көрөөччүлэри сөхтөрдүлэр, Евдокия Гаврильевна, Алексеева Алиналыын сахалыы үҥкүүнүү үҥкүүлээн көрөөччүлэргэ бэлэх ууннулар, Светлана Константиновна, Попов Ильдардыын кылаас олоҕуттан көрдөөх сыаҥкалары сыанаҕа оонньоон,көрөөччүлэри быара суох ыыттылар, Елена Егоровна, Кононова Миялыын "Чороонноох үҥкүүнү" үҥкүүлээн көрөөччү биһирэбилин ыллылар. Учууталларбыт, үөрэнээччилэрбит олус да талааннаах эбиттэр.

V - бүтэһик түһүмэх, "Деловой стиль" диэн, манна кыттааччылар үөрэххэ, үлэҕэ кэтэргэ аналлаах дьыалабай истиил таҥастарын кэтэн үрдүк сыанаҕа хаамтылар. Учууталларбыт эчи кэрэлэрин, үөрэнээччилэрбит эчи үчүгэйдэрин. Көрөөччүлэр дохсун ытыс тыаһынан кыттааччылары үрдүк сыанаҕа көрүстүлэр. Дьүүллүүр сүбэҕэ, 3 киһи үлэлээтэ. Оскуолабыт бэтэрээн учуутала, өр сылларга история, иитэр үлэҕэ дириэктэри солбуйааччынан, комсомол кэмитиэтигэр үлэлээбит,билигин бочуоттаах сынньалаҥҥа олорор Васильева Анна Николаевна бэрэссэдээтэлинэн үлэлээтэ, орто оскуола педагог-бибилэтиэкэрэ, саха тылын уонна литературатын учуутала Колтовская Софья Семёновна уонна оскуолаҕа киириэн иннинээҕи саастаах оҕо тэрилтэтиттэн, иитээччи идэлээх Самсонова Лилиана Владимировна ситиһиилээхтик үлэлээтилэр. Тэрийээччилэр ааттарыттан, дьүүллүүр сүбэҕэ махталбытын тиэрдэбит.

Дьоро киэһэни оскуолабыт инники эрэллэрэ, ырыа - үҥкүү доҕордоох кырачаан оҕолорбут ыллаан - туойан киэргэттилэр.  Күрэхпит саамай долгутуулаах кэминэн, түмүгү таһаарыы буолла. Түмүк маннык: III миэстэни ыллылар, 6 кылаас кэллэктиибэ Долгунова Е.Г уонна Алексеева Алина, 2 миэстэни, 9 кылаастар Никифорова Е.Е. уонна Кононова Мия, 1-кы миэстэни, 5-с кылаастар Осипова А.В уонна Иванова Оля ыллылар. «Кылаан кыайыылаах» анал ааты 7-с кылаас кэллэктиибэ Дмитриева С.К уонна Попов Ильдар ыллылар. Бары кыттааччыларга дипломнары,бэлэхтэри туттардылар. Махталбытын тиэрдэбит, куруук кулуупка ыытыллар тэрээһиннэрбитигэр күүс - көмө, өйөбүл буолар, орто оскуола коллективыгар, бары кыттааччыларга, оҕолорго, учууталларга, дьүүллүүр сүбэҕэ. Дьэ, бу курдук Тылгыныбыт нэһилиэгэр биир сонун күрэх, учуутал күнүн көрсө үрдүк таһымҥа ыытылынна. Күрэҕи Григорьев Т.В. ыытта. Учууталлары өссө төгүл идэлээх бырааһынньыккытынан эҕэрдэлиибит, айымньылаах үлэҕитигэр ситиһиилэри баҕарабыт.